Русија затвори седум железнички гранични премини со Финска, Естонија и Летонија, според владина уредба објавена вчера.
Суспензијата, која стапува во сила на 1 јули, го запира движењето на поединци, возила и товар преку назначените железнички премини. Пет од затворените контролни пунктови се наоѓаат на финската граница и по еден во Естонија и Летонија
Властите не ги открија причините за затворањето или кога премините би можеле повторно да се отворат. Финска со ова останува без отворени железнички премини со Русија, која вообичаено извезува ѓубриво по железница.
Финска ги затвори своите источни гранични премини за возила и пешаци со Русија на неодредено време во декември 2023 по напливот на баратели на азил. Хелсинки тврдеше дека напливот бил хибриден напад од Кремљ како одмазда за приклучувањето на Финска во НАТО.
Новата одлука доаѓа во време кога Русија гради воена инфраструктура долж границата со НАТО. Неодамнешната истрага на шведската телевизија „СВТ“ и на норвешката „НРК“ откри дека Русија гради касарни, складишта за муниција и логистички објекти во близина на границите со Финска, Норвешка и балтичките држави, со планови за евентуално стационирање до 115.000 војници таму откако ќе се смири војната во Украина.
