Компанијата Nintendo оваа есен ќе отвори нов ресторан, чиј ентериер и декорации ќе бидат инспирирани од легендарните Nintendo франшизи како што се Metroid и The Legend of Zelda.
Во изминатите години беа отворени повеќе локации со Nintendo тематика, меѓу кои и кафуле во стилот на Kirby во Јапонија, додека кафулето Hatena Burger се наоѓа во рамките на Nintendo музејот. Поради големата популарност меѓу обожавателите, компанијата подготвува уште едно уникатно гастрономско искуство.
Nintendo официјално објави дека во својот музеј во градот Уџи, Јапонија, ќе го отвори ресторанот Super Family Restaurant. Името претставува игра на зборови инспирирана од оригиналното јапонско име на конзолата SNES – Super Family Computer или попознато како Super Famicom.
Покрај откривањето на името и логото, Nintendo објави и неколку фотографии од внатрешноста на ресторанот, кој треба да ги отвори вратите наесен. На прв поглед, просторот наликува на класичен ресторан, но посетителите ќе можат да забележат препознатливи Nintendo елементи, меѓу кои биста од оклопот Power Suit на Самус, реплика на легендарниот меч Master Sword, како и статуа во природна големина на Линк од играта The Legend of Zelda: Breath of the Wild.
Според официјалниот профил на Nintendo музејот, ресторанот ќе нуди разновидно мени со храна и десерти.
За љубителите на Nintendo кои планираат да го посетат музејот пред отворањето на новиот ресторан, достапно е веќе споменатото кафуле Hatena Burger. Иако неговото мени е поограничено од она што се очекува во Super Family Restaurant, посетителите можат да уживаат во слична атмосфера инспирирана претежно од франшизата Mario, но и со елементи од Animal Crossing и The Legend of Zelda.
Nintendo музејот, кој првпат беше најавен во 2021 година, официјално беше отворен за јавноста во 2024 година. Тој нуди уникатен поглед во светот на Nintendo преку интерактивни изложби, работилници и приказ на историјата на компанијата уште од периодот пред да започне да произведува видеоигри.
Музејот се наоѓа на локацијата на поранешна фабрика во сопственост на Nintendo, каде што некогаш се произведувале карти за играње и се вршеле поправки на производите на компанијата. Затоа, посетителите кои се заинтересирани за богатата историја на Nintendo ќе имаат можност да откријат многу интересни содржини, без разлика дали ќе го посетат кафулето, новиот ресторан или само музејот.
