Пишува: Бехџет Муслиу, основач на Агенцијата за вести Zhurnal.mk
Скопје, 15 јуни – Еден од основните принципи на доброто владеење е пристапноста и брзиот и правичен одговор кон граѓаните. Функцијата министер не е привилегија, туку одговорност, а кога функционерот станува неодговорен, ја претвора во привилегија. Да се биде министер не значи дистанцирање од граѓаните, туку обврска да се доближиш до нивните маки, проблеми и потреби.
Азир Алиу, долго време си во политиката, си поминал низ различни функции, но изгледа дека сè уште не си ги разбрал овие два концепта.
Политиката е професија што носи должност и одговорност, додека функцијата е служба. Кога имаш функција, или си слуга на граѓаните или (се обидуваш да бидеш) владетел; златна средина нема. Подобро избери го првото и биди слуга, бидејќи крајот на владетелите е и брз и катастрофален.
Токму поради оваа причина, сè почесто се слушаат поплаки и критики од граѓаните во врска со недостигот на комуникација од страна на министерот за здравство, Азир Алиу.
Многу граѓани тврдат дека со недели не можат да добијат одговор на своите проблеми, дури и кога станува збор за прашања што директно се поврзани со здравствениот систем и нивните животно важни потреби. Оваа твоја рамнодушност, Азир Алиу, уште повеќе ја намалува довербата на граѓаните во институциите на државата.
Се разбира, никој не очекува еден министер лично да ги решава сите проблеми на секој граѓанин. Но граѓаните имаат право да очекуваат институциите да функционираат, нивните барања да бидат слушнати и некој да понесе одговорност за проблемите што се појавуваат. Кога комуникацијата недостасува, се создава впечаток дека институцијата се оддалечила од својата основна мисија. Знаеме дека немаш магично стапче, но знаеме и дека не си ниту глув ниту нем, бидејќи доволно зборуваше и слушаше во кампањата. Сега е време да слушаш и да дејствуваш, да решаваш проблеми, затоа што си на чело на институцијата.
Загриженоста не завршува тука…
Според информациите што ги обработува Агенцијата “Zhurnal”, постојат тврдења за вработувања во неколку здравствени институции каде што, според изворите, биле фаворизирани одредени кандидати преку различни влијанија и интервенции, додека многу млади луѓе кои дипломирале пред години и понатаму ја чекаат својата прва можност за вработување. Значи, сите овие поплаки и загрижености поврзани со здравството секојдневно пристигнуваат во нашата редакција.
Доколку овие тврдења се покажат како точни, тогаш станува збор за многу поголем проблем од недостатокот на комуникација.
Станува збор за нарушување на принципот на меритократија, кој треба да биде темел на секоја јавна институција. Со ваков пристап се доаѓа и во судир со политичкиот субјект на кој му припаѓа министерот. Тие прокламираат предност за професионализмот и експертизата, а нивниот министер се сомничи за фаворизирање кандидати без да ги поминат соодветните филтри.
Оваа Влада често апелира младите да не ја напуштаат државата. Постојано слушаме пораки дека се создаваат нови можности, дека се инвестира во нивната иднина и дека државата има потреба од нови кадри, особено во здравството. Но овие пораки ја губат својата тежина кога младите гледаат дека дипломата, посветеноста и резултатите не се секогаш одлучувачки фактори за добивање работно место. Она што ти треба е да го носиш презимето Алиу или да го имаш телефонскиот број на некој министер. Против ова вие се боревте со зборови, немојте сега со дела да нè потсетувате на истиот филм.
Еден млад човек не ја напушта државата само поради платата.
Тој заминува кога ќе ја изгуби довербата дека може да напредува со работа и заслуга.
Заминува кога ќе се увери дека можностите не се еднакви за сите. Заминува кога гледа дека некој друг напредува побрзо не поради способностите, туку поради врските. Овој пристап е рак на меритократијата и остава долгорочни последици.
Затоа, Азир Алиу (министере), и секој јавен функционер треба да разбере дека функцијата што ја извршува не е само административна титула. Таа е одговорност кон граѓаните, кон младите кои бараат надеж и кон семејствата кои очекуваат правда и еднаков третман.
Знаеме дека ти и твоето семејство, во случај на некаква несреќа, можете да се лекувате и надвор од државата, но не сите го имаат тој луксуз.
Со полна уста кажа дека твоите деца ќе се школуваат во странство, што значи дека како родител немаш доверба во домашните образовни институции за нивното образование во земјата. Но сега, те молам, немој да ни го уништиш и здравството. Бидејќи не сите имаат можност да се образуваат и лекуваат во странство.
Институциите не ја добиваат довербата на граѓаните со прес-конференции или празни политички изјави. Довербата се добива со транспарентност, комуникација, еднаков пристап и одлуки што ќе ги убедат граѓаните дека системот функционира еднакво за сите. На крајот од денот, Министерството за здравство не постои за некој да стане министер, во овој случај ти, туку за да им служи на граѓаните, бидејќи здравствената заштита е витална и неотуѓива за секоја општествена категорија.
Ако сакаме младите да останат во својата држава, тогаш мора да им дадеме причина да веруваат дека нивната иднина зависи од нивните способности и труд, а не од имиња, врски или нечии интервенции. Да ги образуваме младите генерации во земјата и да ги лекуваме сите категории граѓани во земјата, затоа што во спротивно ќе се претвориме во држава со знаење увезено однадвор и во просјаци кои плаќаат огромни суми за лекување надвор од државата.
