Откако заврши долгогодишната соработка меѓу EA Sports и FIFA, светската фудбалска организација направи неочекуван потег и влезе во партнерство со Netflix, што предизвика многу прашања во гејминг индустријата.
Според извештаи, по распадот на соработката со EA, FIFA била во напредни преговори со компанијата 2K Games за развој на нова фудбалска симулација. Планот бил амбициозен – да се добие долгорочна лиценца за Светското првенство и пристап до FIFPRO, што би овозможило целосни клубски и репрезентативни права.
Сепак, преговорите не успеале. Причината, според неофицијални информации, е тоа што FIFA барала побрзи и попрофитабилни решенија, наместо долг развоен циклус за конзоли и PC игри.
Во таа насока, организацијата се свртела кон поинаков модел – мобилна и стриминг ориентирана игра, во соработка со Netflix. Новиот проект е претставен како „launch edition“, со план за постепено додавање содржина и надградби во иднина.
Сепак, дел од индустријата со скепса гледа на овој потег, оценувајќи дека ваквиот модел може да заврши како уште една „live service“ игра што нема да го исполни својот потенцијал.
И покрај тоа, соработката меѓу FIFA и Netflix отвора ново поглавје во спортскиот гејминг – но и голема дилема дали фудбалот на конзоли полека се сели во историјата.
