Корисниците на Instagram добиваат функција што долго ја очекуваа и која го менува изгледот на профилите на мрежата
Instagram го олесни креирањето на посакуваниот изглед и естетика на профилите. Апликацијата во сопственост на Meta конечно воведе можност за преуредување на мрежата (grid), речиси една година откако шефот на Instagram, Adam Mosseri, го најави доаѓањето на оваа функција. Според USA Today, корисниците ширум светот сега можат да ги преместуваат своите објави без разлика кога биле објавени.
„Знаеме дека ова требаше да биде направено уште одамна, но сакавме да одвоиме време за да ја реализираме функцијата како што треба“, соопштија од Meta.
Можноста за преуредување на распоредот на објавите и понатаму е една од најбараните функции во апликацијата, а Meta планирала да ја воведе многу пред Мосери да го најави нејзиното доаѓање минатата година. Alessandro Paluzzi, познат по откривањето на нови и сè уште необјавени функции преку обратен инженеринг на апликации, уште во 2022 година ја забележал опцијата „Edit Grid“ во Instagram.
Доколку ви здодеало да ги гледате објавите по хронолошки редослед и сакате да направите промени, потребно е да отидете на вашиот профил и подолго да притиснете на која било објава. Покрај опциите „Pin to Main Grid“ и „Archive“, сега ќе ја видите и опцијата „Reorder Grid“. Со нејзино избирање ќе се отвори нов прозорец каде што можете да ги преместувате објавите и да го организирате вашиот профил токму онака како што сакате да изгледа.
Важно е да се напомене дека секоја објава што ќе ја закачите (pin) ќе остане на врвот на вашиот профил и ќе биде затемнета во прозорецот „Reorder Grid“.
