One UI 9 воведува дополнителна проверка на идентитет пред исклучување или рестартирање на телефонот, што може да помогне во случај на кражба.
Samsung во One UI 9 системот го менува начинот на кој корисниците го исклучуваат или рестартираат Galaxy телефонот. Иако на прв поглед може да изгледа необично, новата верзија на системот ќе бара внесување PIN код, лозинка или шема пред уредот навистина да се исклучи или рестартира.
Оваа промена е дел од пошироко зајакнување на безбедносните функции во One UI околината. Samsung претходно овој месец го започна One UI 9 Beta програмот, базиран на Android 17 системот, а корисниците на Galaxy S26 серијата во шест земји веќе можат да ја тестираат новата верзија на софтверот.
One UI 9 бара PIN пред исклучување на Galaxy телефонот
Промената функционира едноставно. Кога корисникот ќе го притисне и задржи страничното копче, менито за исклучување на телефонот се отвора како и досега. Меѓутоа, кога ќе допре „Power off“ или „Restart“, системот бара проверка преку PIN код, лозинка или шема за заклучување на екранот.
Samsung не го заклучи само влезот во менито за исклучување, туку самата акција на исклучување и рестартирање на уредот. Уште поинтересно е што корисникот нема да може лесно да излезе од тоа мени и да се врати на почетниот екран без проверка на идентитетот. Ако не внесе точна заштита, телефонот останува „заглавен“ во Power off менито сè додека уредот не се отклучи.
Ваквото решение има смисла во случај на кражба или губење на телефонот. Ако некој украде Galaxy уред додека е отклучен, нема да може веднаш да го исклучи и на тој начин да спречи следење, поврзување со мрежа или други заштитни механизми. Обидот за гасење практично ќе го заклучи уредот и ќе го блокира понатамошниот пристап до системот.
Функцијата моментално е достапна во втората One UI 9 бета надградба. Засега не е сигурно дали Samsung ќе ја задржи во финалната верзија или ќе ја измени врз основа на реакциите на корисниците. Доколку остане дел од финалното издание, ќе биде една од попрактичните безбедносни промени за Galaxy телефоните, пренесува Sammobile.
