Поранешниот премиер на Црна Гора, Здравко Кривокапиќ, повторно го отвори прашањето за односите меѓу државата, црквата и идентитетската политика во Црна Гора, по негова објава на социјалната мрежа X во која се осврна на Српската православна црква и на одлуката од мај 2006 година со која била дефинирана „Православната црква во Црна Гора“.
Тој наведува дека треба да се врати одлуката од мај 2006 година, со која била утврдена организациската рамка на православните епархии во Црна Гора.
Кривокапиќ, коментирајќи ги односите во Српската православна црква и политичките прилики, отворено го нападна патријархот Порфириј, порачувајќи дека „оној кого не го избрал Светиот Дух – не е достоен“, а потоа побара враќање на одлуката со која била дефинирана „Православната црква во Црна Гора.
Според објавените информации, со таа одлука на Светиот архиерејски собор на Српската православна црква од 26 мај 2006 година било дефинирано дека „Православната црква во Црна Гора“ ја сочинуваат епархиите на СПЦ во Црна Гора: Црногорско-приморската, Будимљанско-никшиќката, како и делови од Милешевската и Захумско-херцеговската епархија.
Истовремено, бил формиран и Епископски совет како координативно тело на епископите на СПЦ во Црна Гора.
Темата предизвика реакции во дел од црногорските медиуми, кои различно ја толкуваат пораката на Кривокапиќ. Дел од нив оценуваат дека станува збор за чувствително прашање кое може повторно да ја отвори дебатата за положбата на православието во Црна Гора, односно за односот меѓу Српската православна црква, црногорскиот државен идентитет и политичките процеси во земјата.
Прашањето за статусот на православните црковни структури во Црна Гора со години е една од најчувствителните теми во јавниот живот на земјата. Тоа беше особено актуелизирано за време на масовните литија против Законот за слобода на вероисповед, кои имаа значајно влијание и врз политичките промени во Црна Гора.
Засега, објавата на Кривокапиќ се чита како уште еден сигнал дека црковното прашање во Црна Гора останува тесно поврзано со пошироките дебати за националниот идентитет, државната политика и односите во регионот. Токму затоа, секое повикување на формулацијата „Православна црква во Црна Гора“ предизвикува различни толкувања: од организациско-црковни до политички и идентитетски, како и најави за основање на посебна Црногорска православна црква.
