Претседателот на Демократската унија за интеграција, Али Ахмети, изјави дека Шестото изборно собрание на огранокот во Тетово денеска ја покажало организираноста и единството на партијата. Тој рече дека со конституирањето на органите на огранокот, ДУИ ја докажала својата подготвеност за идните предизвици. Ахмети, исто така, го оцени ангажманот на постарите и помладите генерации во рамките на партијата.
„Вечерва, Тетово зборуваше силно! Шестото изборно собрание на огранокот во Тетово уште еднаш докажа дека Демократската унија за интеграција останува најорганизираната, најзрелата и најодлучната политичка сила во државата. Со конституирањето на сите органи на огранокот, Тетово вечерва испрати јасна порака: нашето единство е нераскинливо, нашата визија е јасна и нашиот пат кон нови победи е неповратен. Ја видов енергијата на генерациите кои ја градеа ДУИ низ годините и решителноста на младите кои денес преземаат одговорност да ја продолжат нашата политичка и национална мисија. Ова обединување на генерациите е најголемата гаранција за успесите што нè очекуваат. Тетово вечерва демонстрираше сериозност, достоинство и подготвеност за предизвиците на времето. Тетово е подготвено. ДУИ е подготвена. Доаѓаат нови победи!“, напиша Ахмети.
