Новиот модел на Honor flagship телефон, кој моментално е во подготовка, би можел да добие 2 nm чип, две камери од 200 MP, 3D препознавање на лице и батерија од најмалку 8000 mAh.
Прелиминарните информации откриваат дека Honor подготвува нов flagship телефон кој ќе биде вистински „ѕвер“ кога станува збор за перформансите и можностите на камерата. Според новите информации што на мрежата Weibo ги објави инсајдерот DCS, компанијата наводно подготвува нов flagship телефон кој би можел да биде моделот Honor Magic 9 Pro.
Доколку гласините се точни, серијата Honor Magic 9 би можела да биде претставена во октомври оваа година, слично како и претходната генерација. Се очекува телефоните да користат ARRI технологија за обработка на слика, што би можело да донесе сериозни подобрувања во фотографирањето и снимањето видео, иако конкретни технички детали засега не се познати.
Првичните информации укажуваат дека Honor Magic 9 Pro би можел да користи чип од новата генерација изработен во 2 nm производствен процес. Најверојатно станува збор за платформата Snapdragon 8 Elite Gen 6, која би го наследила Snapdragon 8 Elite Gen 5 од моделот Honor Magic 8 Pro.
Honor Magic 9 Pro цели кон две камери од 200 MP
Телефонот би требало да има рамен LTPO 2.0 екран со дијагонала од 6,8 инчи и 1.5K резолуција. Тоа би бил нешто поголем панел во споредба со 6,71-инчниот екран кај претходната Pro генерација.
Најголемиот скок сепак се очекува кај системот на камери. Според истиот извор, Honor Magic 9 Pro би можел да добие главна камера од 200 MP со сензор со големина од 1/1,28 инчи, како и перископска телефото камера од 200 MP. Со тоа Honor би се обидел директно да одговори на конкуренцијата од OPPO и Vivo.
Уште една важна новина би можело да биде 3D препознавањето на лице, што би го направило биометриското отклучување уште побезбедно. Се споменува и можноста за користење на технологијата Metalenz Polar ID, која наводно е подготвена за своето деби на пазарот. Покрај тоа, телефонот би требало да има и 3D ултразвучен сензор за отпечаток од прст.
Honor Magic 9 Pro би можел да добие батерија со капацитет од најмалку 8000 mAh, безжично полнење и куќиште со висок степен на заштита од вода. Сепак, бидејќи станува збор за неофицијални информации, сите детали треба да се земат со доза на резерва сè додека Honor не ги објави официјалните спецификации, пренесува Android Headlines.
Konekt.mk
