На меѓународен конгрес во Скопје се собраа најеминентните доктори по пластична хирургија. На „Skopje Flap Course“, организиран од МАРМ, меѓу другото беше кажано дека злоупотребата на ботокс и филери од страна на некомпетентни лица во козметичките салони и фризерници довела многу пациенти да завршат со здравствени последици. Софија Пејкова од Асоцијацијата на реконструктивни хирурзи на Македонија истакна дека граѓаните треба да бидат многу внимателни при несертифицирани инјекции и интервенции од лица кои не се лекари.
„Ние сме тука за едукација на младите специјализанти во реконструктивната микрохирургија, многу сериозна и тешка дисциплина, па нека им остане на тие што ја работат!“, рече Софија Пејкова.
Дали е во ред да го прават тоа?
„Апсолутно, секој треба да си ја работи работата професионално, затоа овде правиме и обуки“, вели Софија Пејкова.
Италијанскиот пластичен хирург Марко Иноченти исто така се изјасни против ваквите естетски интервенции од некомпетентни лица и со нелиценцирани медицински материјали, па дури ја поздрави и интервенцијата на надлежните органи.
„Да, мислам дека е многу опасно затоа што добрата пракса има смисла, проблемот настанува кога се прават овие ризични пополнувања од нестручни лица, дури ни доктори, туку нешто слично! Тоа отвора многу опасен сценарио и мора да биде контролирано од надлежните институции, бидејќи секоја друга форма може да биде опасна“, вели Марко Иноченти.
Алармот кој ТВ21 го покрена пред една година, стана предмет и на истражните органи. 14 лица, меѓу кои и лекари, беа уапсени под сомнение за шверц на медицински производи за естетски интервенции, ботокс и филери. Големата полициска акција, спроведена по неколкумесечна истрага, опфаќа вкупно 19 лица и 6 компании, осомничени за здружување заради криминал, повреда на индустриска сопственост и примање мито.
