Премиерот Христијан Мицкоски денеска објави дека е постигнат значаен договор со синдикатите УПОЗ и САДУ, со кој се предвидува постепено покачување на платите за вработените во администрацијата, судовите и обвинителствата. Планот предвидува вкупен раст на платите од речиси 40% до 2028 година.
„Ова е поширок пакет кој опфаќа околу 11.000 вработени. Владата, како најголем работодавач, воспоставува договор кој гарантира достоинствено ниво на плати. Ова е историски момент бидејќи досега никогаш не сме имале ваков долгорочен план за усогласување на примањата“, изјави Мицкоски.
Премиерот посочи дека по договорите со вработените во образованието и здравството, сега се заокружуваат односите и со државната администрација.
„Овие храбри чекори се резултат на домаќинско и одговорно работење со државната каса, дури и во услови на светски економски предизвици“, додаде тој.
