Здружението на превозници на Црна Гора соопшти дека ги прекинува граничните блокади на товарниот сообраќај, откако со Владата постигнало договор за пакет мерки што треба да ја олеснат работата на транспортните компании и да го намалат притисокот врз снабдувачките ланци. Одлуката е донесена по преговори одржани на 29 јануари 2026 година.
Според објавените детали, договорено е повратот на ДДВ за транспортните компании да се врши во законски предвидениот рок, да се изготви предлог за бенифициран работен стаж за возачите, како и да се продолжи работното време на одредени гранични инспекции, со цел да се намалат застојот и административните „гушења“ на премините.
Во рамки на разговорите е отворена и темата за повисок поврат на акцизи, за што, според најавите, Владата ќе разговара со „европските партнери“, како и за одредбите поврзани со ЕТИАС, кои превозниците ги гледаат како дополнителен ризик за нивната оперативност на релации кон ЕУ.
Блокадите во регионот во изминативе денови беа дел од поширок превознички протест на Западен Балкан поврзан со построга примена на правилото за престој „90 дена во 180“ и со новите европски системи за контрола на влез/излез, за кои превозниците тврдат дека се неспоиви со природата на нивната работа и со турите низ Шенген-зоната.
