Од оваа година, Општина Ѓорче Петров ќе доделува по 8.000 денари, еднократна финансиска поддршка за секое новородено дете, конкретна помош во најубавите, но и најодговорни моменти за секое семејство.
– Ова не е само финансиска мерка, туку јасна порака дека семејството, децата и иднината се нашиот приоритет, но и порака за посветеност кон семејството, децата и кон демографскиот развој, како и континуирана грижа за младите брачни парови кои ја градат својата иднина во Ѓорче Петров. Инвестираме во животот од самиот почеток. Продолжуваме со политики што носат сигурност, грижа и поддршка – таму каде што е најважно – велат од локалната самоуправа.
Градоначалникот на Општина Ѓорче Петров, Александар Стојкоски, истакна дека оваа одлука е дел од пошироката визија за зајакнување на семејството како темел на локалната заедница.
– Секое новородено дете е нов почеток, надеж и наша заедничка одговорност. Со оваа зголемена финансиска поддршка испраќаме јасна порака дека стоиме зад младите семејства и дека инвестираме во животот од самиот почеток. Грижата за децата не е трошок, туку највредната инвестиција во иднината на нашата општина – изјави Стојкоски.
Тој додаде дека финансиската поддршка од 8.000 денари претставува директна помош за родителите, но и симбол на општинска политика насочена кон создавање сигурна, стабилна и охрабрувачка средина за раст, развој и достоинствено детство.
