Благодарение на екстремниот режим за заштеда на енергија, мобилните телефони од претстојната серија Mate 80 на Huawei ќе можат да издржат и до 2 недели без полнење.
Huawei се подготвува за претставување на новата серија мобилни телефони Mate 80, кое е закажано за 25 ноември во Кина. Како што се приближува претставувањето, излегуваат сè повеќе информации за уредите, а според најновата објава на кинеската компанија, откриено е дека ќе имаат екстремен режим за заштеда на енергија.
Според видеото кое Huawei го објави на кинескиот Weibo, видливо е дека ваквиот режим на заштеда ќе се вика Outdoor mode и ќе им овозможи на корисниците батеријата да им трае и до 14 дена со едно полнење, што е навистина импресивно.
За да се постигне тоа, од Huawei велат дека корисниците ќе можат да пристапат само до основните функции на телефонот, кои се оптимизирани за користење на уредот во покомплексни услови без електрична енергија, на пример, за време на повеќедневно планинарење.
Huawei сè уште нема потврдено дали серијата Mate 80 ќе стигне во Европа. Гледано историски, тоа не е невозможно, но поради послабата продажба на телефоните на компанијата надвор од Кина, постои реална шанса Mate 80 да остане исклучиво за кинескиот пазар.
