Годишната стапка на инфлација во Грција малку се зголеми од септемвриските 1,9 проценти на два проценти, објави денес Грчкиот завод за статистика (ЕЛСТАТ).
Цените на храната и безалкохолните пијалоци се зголемија за 1,5 проценти на годишно ниво, трошоците за домување за 3 проценти, цените на алкохолните пијалоци и тутунот за 1,2 проценти, рекреацијата и културата за 1,5 проценти, здравствената заштита за 3,6 проценти, хотелите, кафулињата и рестораните за 6,1 процент, што во сите споменати случаи е побрз раст отколку во септември.
На месечна основа, цените се зголемија за 0,1 процент, првенствено поради зголемувањето на цените во категоријата храна и безалкохолни пијалоци, особено пекарските производи, месото, свежото овошје и зеленчукот. Делумно намалување на инфлацискиот притисок дојде од поевтината свежа риба, маслиновото масло и кафето.
