„Супердрвото“ е лансирано како комерцијален производ, произведен од InventWood, компанија кооснована од научникот за материјали Лианбин Ху.
Пред повеќе од една деценија, Ху тргнал во потрага по редизајн на еден од најстарите градежни материјали познати на човекот. Додека работел во Центарот за иновации на материјали на Универзитетот „Мериленд“, тој пронашол иновативни начини за редизајнирање на дрвото.
Неговата цел била да го зајакне дрвото, користејќи целулоза, главната компонента на растителните влакна.
Пробивот се случил во 2017 година, кога Ху прв пат го зајакнал обичното дрво со хемиски третман за да ја подобри неговата природна целулоза, правејќи го подобар градежен материјал.
Дрвото прво било варено во сад со вода и избрани хемикалии, а потоа топло пресувано за да се стврдне на клеточно ниво, правејќи го значително погусто. На крајот од процесот што траел една недела, добиеното дрво имало сооднос на цврстина и тежина „повисок од повеќето структурни метали и легури“, според студија објавена во списанието Nature.
InventWood тврди дека супердрвото е до 20 пати поцврсто од обичното дрво и до 10 пати поотпорно на вдлабнатини, бидејќи природната порозна структура на дрвото е уништена и зајакната. Ова го прави отпорно на габи и инсекти. Исто така, добива највисока оценка во стандардните тестови за отпорност на пожар.
Секако, чини повеќе од обичното дрво и има поголем јаглероден отпечаток во производството.
