На митингот на коалицијата ВЛЕН во Арачиново, кандидатот за градоначалник на Општина Чаир и еден од лидерите на коалицијата, Изет Меџити, остро му одговори на својот политички противкандидат Бујар Османи, повторно повикувајќи го на телевизиски дуел.
Меџити истакна дека Османи се обидува со задоцнети настапи и политичко глумење да создаде лажен впечаток пред јавноста, откако, како што рече, „видел дека ја губи поддршката“.
„На почетокот на кампањата јавно го повикав Бујар Османи на телевизиски дуел, за да се соочиме со програми и аргументи, затоа што ВЛЕН донесе конкуренција меѓу Албанците — конкуренција во идеи, визии и дела. Сакав тоа да биде фер политичка трка: кој ќе направи повеќе за Чаир, за Арачиново, за нашите граѓани,“ изјави Меџити.
Тој потсети дека Османи тогаш одбил да прифати дуел, со изговор дека ќе дебатира со лидерот на ВМРО-ДПМНЕ, Христијан Мицкоски. „А вчера и завчера, кога виде дека ја губи битката, отиде пред МРТВ и глумеше: ‘Еве дојдов, Изет не дојде’. Му одговорив и писмено, но сега му порачувам и јавно од Арачиново – Бујар, избери сам каде. Земи го Али Ахмети, земи го Артан Груби, земи ги сите твои ПР-агенции и дојди. Избери медиум, плоштад или сала, јас ќе дојдам,“ порача Меџити.
Тој додаде дека е подготвен за директно соочување „со аргументи, програма и визија“, нагласувајќи дека граѓаните заслужуваат транспарентност и реална дебата, а не политички театри.
Меџити заврши со порака дека „времето на монопол на една партија во албанскиот политички простор завршува“ и дека „граѓаните сега имаат вистинска алтернатива која нуди развој, еднаквост и одговорност“.
