Кандидатот за градоначалник на Скопје, Орце Ѓорѓиевски, денес ја претстави својата визија за главниот град, истакнувајќи дека клучот за успешен град е човечкиот пристап и посветеност на граѓаните.
„Прво човек, потоа градоначалник“, порача Ѓорѓиевски, нагласувајќи дека неговата мисија е да го направи Скопје град во кој секој ќе живее достоинствено, безбедно и гордо. Тој истакна дека не сака да дава празни ветувања, туку да работи чесно и со срце, со конкретни мерки кои веќе се покажани во општина Кисела Вода.
Ѓорѓиевски најави изградба на нови паркови и зелени коридори, модернизација на јавниот превоз, ред во сообраќајот, подобрување на училишта и поддршка за младите, како и воведување на смарт и дигитални решенија за модерно европско Скопје.
„Скопје е наш заеднички дом. Ние, скопјани, можеме да направиме промена. Доаѓа време на работа, време кога тоа подобро заедно ќе го живееме“, истакна Ѓорѓиевски.
Во својот говор, тој изрази благодарност и до премиерот Христјан Мицкоски за поддршката и довербата, нагласувајќи дека неговата кампања е базирана на непосреден контакт со граѓаните и решавање на нивните секојдневни проблеми.
