Директорот на полицијата, Драган Василјевиќ, на 4 септември официјално го информирал Обвинителството за организиран криминал дека ја поништува согласноста за назначување 17 припадници на полицијата – членови на Ударната група задолжена со истрагата на финансиските текови поврзани со падот на надстрешницата. Како причина се наведува усвојување нова систематизација, дознава Радар од МВР.
Со оваа одлука, иднината на самата Ударна група, но и истрагата за трагедијата, е сериозно загрозена.
Посебно е забележливо што во Обвинителството за организиран криминал постојат уште четири ударни групи во кои учествуваат полициски службеници, но според новата систематизација, нивната улога не се доведува во прашање.
На истиот датум, на седница на Владата на Србија, од функцијата е разрешена и Нада Новосел, помошник директор на Управата за јавни приходи и главен инспектор на даночната полиција. Новосел токму како помошник директор именуваше инспектори од даночната полиција во состав на Ударната група за истражување на корупцијата, поврзана со падот на надстрешницата во Нови Сад и смртта на 16 лица.
Инаку, Ударната група предводена од Обвинителството за организиран криминал, на 1 август спроведе акција во која беа обвинети повеќе лица, меѓу кои и двајца поранешни министри за градежништво, сообраќај и инфраструктура – Томислав Момировиќ и Горан Весиќ – за корупција во случајот на падот на надстрешницата, како и при изградба на железничката линија од Нови Сад до Келебија.
Извор: Radar
