Кандидатот за градоначалник на Чаир од коалицијата VLEN, Изет Меџити, на настан во оваа општина беше прашан за неговиот став во врска со последните изјави поврзани со Бадинтеровиот принцип.
Меџити истакна дека Бадинтеровиот механизам и Охридскиот рамковен договор претставуваат основа на државата и гаранција за стабилноста.
„Ние сме во кампања за локални избори и треба да се занимаваме со проблемите на граѓаните. Кога ќе дојдат парламентарните избори, ќе се занимаваме со тие теми. Што се однесува до изјавите на Димитриевски, веројатно тој се занимава со филмови од пред 2001 година. Тие филмови завршија. Бадинтеровото мнозинство и Охридскиот рамковен договор се темелите на државата. Тоа е иднината. Сè друго е стар филм и дел од минатото,“ изјави Меџити.
Тој додаде дека почитувањето на Охридскиот рамковен договор и Бадинтеровиот механизам остануваат клучни за меѓуетничка еднаквост и стабилност во земјата.
