Стотици луѓе се уапсени на протест во Лондон во поддршка на групата „Палестинска акција“, која неодамна беше забранета од британската влада. Метрополитенската полиција потврди дека се уапсени 474 лица, што е најголем број апсења во еден ден за една деценија, објавува Би-Би-Си.
Според полицискиот извештај, 466 демонстранти се уапсени за поддршка на забранетата организација, петмина за напад врз полицајци, двајца за прекршување на јавниот ред и мир и еден за злосторство од омраза. Ниеден полицаец не е сериозно повреден.
Меѓу уапсените е и 89-годишна жена, објавија британските агенции.
Протестот, организиран од групата „Заштитете ги нашите поротници“ на Парламентарниот плоштад во Вестминстер, привлече помеѓу 500 и 600 луѓе. Точно во 13 часот, додека заѕвонуваше Биг Бен, стотици демонстранти истовремено држеа рачно напишани знаци на кои пишуваше „Се спротивставувам на геноцидот. Ја поддржувам Палестинската акција“.
Снимките од плоштадот покажаа дека полицијата се движи меѓу демонстрантите, кои претежно мирно седеа на земја. По кратки разговори, полицијата почна да ги апси. Демонстрантите трпеливо чекаа на својот ред, а оние што одбија да станат беа изведени од толпата од полицијата, извикувајќи „срам да ви е“. Меѓу уапсените беше и 89-годишна жена.
Многу демонстранти одбија да зборуваат со медиумите, но некои ги споделија своите причини. „Ако ја забранат Палестинската акција, која е следната група? Додека едноставно не ни биде дозволено повеќе да протестираме против ништо. Тоа е против демократијата“, изјави еден демонстрант за Би-Би-Си.
27-годишната Клаудија Пена-Рохас додаде: „Не мислам дека некој сака да биде уапсен, но повеќе сум загрижен за тоа што се случува со народот на Палестина во моментов и одбивам да бидам случаен минувач“.
86-годишниот Џејкоб Еклстоун рече: „Верувам во слободата на говорот. Она што оваа влада се обидува да го направи е длабоко авторитарно. И е исклучително опасно“.
Министерката за внатрешни работи Ивет Купер ѝ се заблагодари на полицијата за нивната интервенција и ја бранеше забраната за групата, велејќи дека таа се заснова на „силни безбедносни совети по сериозните напади што ги изврши групата“. Амнести интернешнл, од друга страна, ги опиша масовните апсења како „длабоко загрижувачки“.
„Демонстрантите на плоштадот на Парламентот не поттикнаа насилство и е сосема непропорционално, до точка на апсурд, да се третираат како терористи“, рече Саша Дешмук, извршен директор на Амнести интернешнл.
Владата ја забрани Палестинската акција во јули според Законот за тероризам, со што членството или поддршката на групата станува кривично дело казниво со до 14 години затвор. Одлуката дојде откако активистите упаднаа во воздухопловната база на РАФ Брајз Нортон во јуни и испрскаа два авиона со црвена боја, предизвикувајќи штета од 7 милиони фунти. Групата започна постапка во Високиот суд на крајот на јули за да ја оспори забраната.
Уапсените демонстранти беа ослободени со кауција под услов да не учествуваат во понатамошни протести во поддршка на групата, додека оние чиј идентитет не можеше да се потврди беа притворени.
