Германски државјанин е експресно осуден и протеран од Македонија со забрана за влез во следните пет години, откако на 5 август, пред фудбалскиот натпревар меѓу Шкендија и Карабаг, веел знаме на „Голема Албанија“, соопшти обвинителството.
Основното јавно обвинителство Скопје, по итна постапка поднесе обвинение за кривично дело – Предизвикување омраза, раздор или нетрпеливост врз национална, расна, верска и друга дискриминаторска основа.
Според обвинението, германскиот државјанин, истакнувајќи го знамето со натпис „Автохтона“, предизвикал чувство на омраза и нетрпеливост по етничка основа. Тој веднаш бил забележан и уапсен од страна на полициските службеници.
По брзата координација меѓу полицијата и обвинителството, Основниот кривичен суд во Скопје донесе пресуда со која го прогласи обвинетиот за виновен.
Изречена му е условна казна затвор од две години, која нема да се активира доколку во наредните пет години не направи ново кривично дело. Судот, исто така, донесе одлука за негово протерување и му изрече забрана за влез во државата во траење од пет години.
