Градоначалникот на Општина Кисела Вода и кандидат за градоначалник на Скопје, Орце Ѓорѓиевски, во гостувањето на Радио Лидер остро реагираше на последните пожари што ја зафатија околината на главниот град, нарекувајќи ги „злосторство против граѓаните“.
Според Ѓорѓиевски, станува збор за намерно подметнати пожари со цел политичка корист, а таквото однесување го нарече нечовечно и крајно опасно. „Нелуѓе се подготвени да загрозат животи само за да добијат политички поени. Ова е недозволиво и бара итна реакција,“ истакна тој.
Апел до институциите
Ѓорѓиевски упати директен повик до Министерството за внатрешни работи и до Јавното обвинителство да преземат итни мерки и да ги идентификуваат и санкционираат одговорните. „Скопје и неговите граѓани не смеат да живеат во страв од чад, отров и пламен подметнат од криминални и политички мотивирани структури,“ додаде тој.
Поддршка за хероите од терен
Во изјавата, Ѓорѓиевски упати благодарност до Противпожарната бригада на Скопје и до сите екипи што со денови се на терен и вложуваат максимални напори за гаснење на пожарите. Тој порача дека заедничката мобилизација на институциите и граѓаните е клучна во борбата со оваа катастрофа.
Како кандидат за градоначалник на Скопје, Ѓорѓиевски најави дека борбата за безбедна и здрава животна средина ќе биде еден од неговите врвни приоритети. „Граѓаните очекуваат чесно и посветено раководење, а не политички игри на нивна штета,“ нагласи тој.
