Во стан во Нови Белград денеска е пронајдено тело на починат маж во поодмината фаза на распаѓање, поради што се претпоставува дека човекот починал пред неколку дена. Како што пренесуваат регионалните медиуми, тој живеел во станот заедно со својата сопруга, која никому не ја пријавила неговата смрт.
Ужасната глетка била откриена сосема случајно, по повик за медицинска помош.
„Сопругата на починатиот паднала и се повредила, по што нејзина роднина повикала Брза помош. Кога медицинската екипа пристигнала на адресата по повикот, во станот затекнала машки леш во поодмината фаза на распаѓање“, открива извор за медиумите.
За случајот веднаш била известена и полицијата, која во моментов ги утврдува сите околности на овој бизарен настан.
Според извори од истрагата, станува збор за постар брачен пар, а изјавата на жената дополнително ги шокирала и збунила инспекторите.
„Таа на преплашените истражители им изјавила дека ‘не ни знаела дека тој починал’ и дека со денови живеела со лешот во куќата. Телото е веднаш испратено на обдукција за да се утврдат точната причина и времето на смртта“, додава изворот.
Полицијата и обвинителството интензивно работат на расчистување на случајот и утврдување на сите факти и околности кои довеле до оваа бизарна и морничава ситуација.
