Грчките власти прогласија вонредна состојба на островите Тинос и Алонисос поради сериозен недостиг на вода за пиење, непосредно пред најинтензивниот дел од летната туристичка сезона.
Одлуката на Министерството за животна средина и енергетика ќе важи три месеци, со можност да биде продолжена доколку состојбата не се подобри.
Вонредната состојба не значи евакуација или забрана за туристички посети. Станува збор за административна мерка со која локалните власти ќе можат побрзо да набавуваат опрема, да ги забрзаат проектите за водоснабдување и да изнајмуваат мобилни постројки за десалинизација.
Потрошувачката на вода на островите нагло се зголемува во летните месеци, кога бројот на посетители повеќекратно го надминува бројот на постојани жители. Истовремено, продолжените сушни периоди ги намалуваат расположливите резерви.
Грчката влада претходно одвои средства за две постројки за десалинизација на Тинос, секоја со капацитет од 300 кубни метри вода дневно. За Алонисос се планирани резервоар од 500 кубни метри и две постројки за десалинизација.
Со слични проблеми во изминатиот период се соочија и Карпатос, Лерос, Патмос, Астипалеја, Сими, Крф и Меганиси, како и поширокиот регион на Атина.
Грчките власти предупредуваат дека недостигот на вода станува долгорочен проблем, особено на островите каде природните извори се ограничени, а летната туристичка сезона создава дополнителен притисок врз водоснабдувањето.
