Уште еден палестински новинар беше убиен во напад на израелската армија врз шаторот што го користела екипа од катарската телевизија Ал Џезира во Газа синоќа, со што вкупниот број на убиени медиумски лица се искачи на шест, соопшти локалната Цивилна одбрана и еден болнички службеник.
-Фотографот Мохамед ал-Халди почина од раните. Со ова, бројот на жртви се искачи на шест, изјави Махмуд Басал, портпарол на Цивилната одбрана во Појасот Газа.
Ал-Халди беше новинар на слободна пракса кој работеше со локалните медиуми. Мохамед Абу Салмија, директорот на болницата Ал-Шифа, во близина на која беше поставен шаторот, ја потврди неговата смрт.
Меѓу жртвите на нападот беше и 28-годишниот новинар на Ал Џезира, Анас ал-Шариф, за кого израелската војска рече дека бил нивна цел. Тие го нарекоа „терорист“.
