Светската здравствена организација (СЗО) објави дека ги нема сите информации за ситуацијата во Русија по минатонеделната смрт на 28-годишна лабораториска работничка во Сибир, за која се сомнева дека починала од чума. Дарја Шипилова почина два дена откако развила симптоми слични на настинка. Таа работела во Истражувачкиот институт за борба против чума во Иркутск, а според некои извештаи, болеста ја добила по несреќа на работното место, пишува Гардијан.
Сепак, руските власти ја негираат поврзаноста на смртта со институтот и тврдат дека Шипилова починала од „пневмонија со непозната етиологија“. Тие уверуваат дека нема опасност од епидемија на чума и ја опишуваат санитарно-епидемиолошката состојба во регионот како стабилна.
И покрај ова, службениците воведоа строги карантински мерки во лабораторијата каде што работеше Шипилова и во блиските болници. Вработените беа заклучени во институтот три дена и спиеја на подовите и столчињата додека се вршеа тестовите.
Генералниот директор на СЗО, Тедрос Аданом Гебрејесус, вчера изјави дека организацијата сè уште нема целосна слика за настанот. „Сè уште немаме целосна слика за овој настан и не можеме да спроведеме сеопфатна проценка на ризикот“, рече тој. „Навременото, целосно и транспарентно споделување на информации е од суштинско значење за разјаснување на спротивставените извештаи и прецизно проценување на потенцијалните ризици за јавноста“, додаде Тедрос.
Тој, исто така, нагласи дека бара дополнително разјаснување од руската влада во врска со непотврдените медиумски извештаи за „друг член на персоналот со пневмонија од непозната причина“. „Ги проверуваме сите извештаи што доаѓаат од заедницата“, рече тој. „Побаравме од Русија одговор за ова и моментално го чекаме“.
Марија Ван Керхове, директорка на СЗО за управување со епидемии и пандемии, нагласи дека агенцијата сè уште не знае како Шипилова се заразила или за каква болест станува збор. Доколку се исклучи пневмонична чума, таа праша: „Од што навистина починала?“
Мајката на починатата, 64-годишната Светлана, во интервју за локалните медиуми ја отфрли теоријата дека нејзината ќерка се заразила откако скршила епрувета. „Ја знам вистината. Морав да се расправам со пријатели кои веруваа во таа глупост. Таа епрувета е нескршлива, дури и ако ја фрлите во ѕид“, рече таа.
Таа ја опиша својата ќерка како посветен работник и чиста личност која била целосно посветена на својата работа. Сомнежи за официјалната верзија изразиле и поранешни соученици. Еден од нив наводно коментирал: „Ја клеветеа жената без вистинска истрага. Таа беше исклучително вредна и одговорна, па затоа едноставно нема смисла за мене.“
Кремљ се обиде да го намали значењето на инцидентот и ја отфрли понудата за помош од американскиот претседател Доналд Трамп претходно оваа недела. Белата куќа врши притисок врз Москва да објави повеќе детали за случајот, нагласувајќи дека ризикот за Соединетите Држави е многу низок.
Трамп во вторникот изјави дека наскоро ќе разговара за чумата со Владимир Путин, кој вчера го прослави својот 74-ти роденден. Кремљ соопшти дека повикот не е договорен, но може брзо да се договори.
Според „Бајкал Медикал Џурнал“, здравствените службеници во Иркутск презедоа обемни мерки за да спречат ширење на потенцијална епидемија. Соседите рекоа дека работниците во бели заштитни одела и гас-маски постојано ја дезинфицирале двокатната зграда каде што живеела Шипилова по нејзината смрт минатиот петок.
Една соседка во нејзините 40-ти години рекла дека мирисот бил неподнослив и многу остар. Таа рекла дека една жена затропала на нивната врата и ја прашала зошто ја прскаат зградата затоа што веќе слушнала гласини за чума. „Таа одговорила дека тоа е против лебарки. Но, воопшто немаме лебарки во зградата. Ја видов како ги пакува комбинезонот во торба и помислив: Во ред, сè разбирам“, додаде таа.
