Струмичкото комунално претпријатие кубури во долгови кои надминуваат 6.5 милиони евра само кон приватни компании. Директорот на претпријатието, Кире Синдраковски вели дека се прави стратегија како да се извлече најголемото општинско претпријатие од лошата финансиска состојба. Според него, ненавременото подмирување на долговите , но и недомаќинското работење е причина мака мачи да излезе од долговите. Работата на Комуналец сериозно била нарушена поради огромни наследени долгови. Вели дека најголем дел од вкупниот долг е кон приватни компании, кој со години бил трупан и не се подмирувал навреме.
„Финансиската состојба не беше добра. Вкупниот долг на комуналното претпријатие е 586 милиони денари. По основ на долгови спрема добавувачи се движеше околу 400 милиони денари. Тоа се долгови кон приватни компании кои да речеме давале некои услуги кон комуналното претпријатие и останале повеќе години несервисирани“, Кире Синдраковски, директор на ЈПКД „Комуналец“.
Во меѓувреме почнале со враќање на дел од долговите, а за развојните проекти на Комуналец ќе барале средства и од странски фондови. За сомнежи во легалното работење на ова претпријатие имаше и неколку кривични пријави за поранешни раководители.
„На почетокот од оваа година состојбата на долгот кон добавувачите беше околу 394 милиони денари, а на крај од јануари месец една линија ставивме некаде 13.02 таа падна на 386 милиони денари. Со домаќинско работење ќе се потрудиме да ја нормализираме состојбата а тоа е најдобро и за градот“, вели Синдраковски.
Освен големи долгови, забележани се и несоодветни пресметки на трошоци за вода и комунални услуги кај голем број компании и физички лица. Од управата на ова претпријатие велат дека ќе се проверува колкав бил бројот на повластени граѓани и компании кои со палаќање премали сметки го оштетувале претпријатието. Ревизијата треба да заврши за неколку месеци.
