Продолжува истрагата за убиствата во Старо Нагоричане. Се врши ексхумација на уште една повозрасна жена, за која Обвинителството има сомненија дека и таа може да е жртва на 25-годишникот од Драгоманце. Како и во првиот случај и таа претходно била закопана како почината од ненасилна смрт.
Осомничениот денес е пренесен на психијатриска клиника каде ќе му се изврши проценка.
„По наредба на судија на претходна постапка, осомничениот Т.Б. денеска е спроведен во ЈЗУ Универзитетска Клиника за Психијатрија за психијатриско вештачење. По завршувањето ќе биде вратен во КПУ Затвор Куманово на издржување мерка притвор“, информираат од установата.
Засега истрагата против него се води за две убиства, но постои можност да се прошири дури една година наназад. Сè уште не се познати мотивите за убиствата на жените.
Министерот за внатрешни работи одби да зборува за случајот, потенцирајќи дека постапува обвинителството. Запрашан дали ќе има евентуална истрага на непостапување на полициски службеници, Тошковски даде потврден одговор.
Обвинителството продолжува да истражува дали осомничениот работел сам, или со нечија помош, но и како постапувале институциите по пријавите.
Лицето и е познато на органите по пријавите за тешки кражби. По претресите во неговиот дом, биле пронајдени дел од украдените работи.
Надлежните повикуваат на смиреност и трпение од јавноста, ветувајќи расчистување на случајот.
