Црногорски државјанин се наоѓа меѓу патниците на крузерот „Хондиус“, каде што е регистрирана појава на хантавирус со смртни последици. Ситуацијата ја следи Светска здравствена организација, која веќе спроведува истрага за начинот на ширење на инфекцијата, додека бродот останува под здравствен надзор во близина на брегот на Африка.
На крузерот имало околу 150 патници и членови на екипажот од повеќе земји, вклучително и европски државјани. Досега се потврдени и сомнителни случаи на инфекција, од кои дел завршиле со смртен исход.
Случајот предизвика сериозна загриженост, бидејќи станува збор за ретка болест која најчесто се пренесува преку контакт со глодари. Сепак, во овој кластер се разгледува и можноста за ограничен пренос меѓу луѓе, особено кај блиски контакти.
Крузерот, кој пловел од Аргентина, е задржан во близина на Зеленортските Острови, откако локалните власти не дозволиле искрцување поради ризик од ширење на инфекцијата. Дел од заразените патници веќе се евакуирани и пренесени на лекување во странство.
Хантавирусот е редок, но потенцијално опасен вирус што може да предизвика сериозни респираторни и бубрежни заболувања. Најчесто се пренесува преку вдишување честички од урина или измет од заразени глодари.
И покрај сериозноста на ситуацијата, од СЗО оценуваат дека ризикот за пошироката јавност засега останува низок, додека истрагата за потеклото и начинот на ширење на вирусот продолжува.
