Првиот заменик-претседател на Владата и министер за европски прашања, Беким Сали, оствари официјална средба во Брисел со генералниот директор за проширување на Европската Унија, Герт Јан Купман.
На средбата се разговараше за спроведувањето на Реформската агенда и Планот за раст, постигнатиот напредок во областа на дигитализацијата, како и за клучните реформи во рамки на процесот на европска интеграција. Притоа беа истакнати конкретните придобивки за граѓаните и бизнис-заедницата, меѓу кои пристапувањето кон Единствената европска платежна област (SEPA) и унапредувањето на дигиталните иницијативи, вклучително и проектот WiFi4WB.
Соговорниците разменија мислења и за третото барање за ослободување на средства во рамки на Реформската агенда, за текот на спроведувањето на реформските патокази, како и за актуелните предизвици поврзани со Системот за влез/излез и трговските политики на Европската Унија.
Во тој контекст беше нагласена важноста на континуираната соработка и ефикасната меѓуинституционална координација за успешно остварување на заедничките цели.
