– Имам многу македонски пријатели и долго размислував за песна за Македонија или за песна во која ќе се споменува името Македонија. Се надевам дека луѓето низ „Ружа са југа“ ќе ја почувствуваат душата на оваа питома земја, на овие драги луѓе. Низ спотот, ќе ги видат и преубавите македонски предели и градови, особено Охрид
Бобан Рајовиќ, познатиот црногорски пејач со 28-годишна естрадна кариера, доаѓа со нова песна која ја раскажува не само вистинската туку и емотивната приказна за Македонија. Тоа е земја која Рајовиќ многу ја сака, и тоа искрено.
За тоа постои убедлива причина. Во Данска, каде што живеел долго време, растел и се дружел со многу Македонци. Го научил македонскиот јазик, ги засакал македонските јадења, а најмногу самата Македонија. И без некој да му се налути, од сите градови, Охрид му остана во срцето, како најубав град, можеби поради езерото, а можеби и поради убавите охриѓанки, кои го имаат тој медитерански шарм.
Новата песна има симболичен наслов „Ружа са југа“. Автор на песната е Славко Стефановиќ-Славкони, човекот чие име стои зад голем број регионални хитови, а видеоспотот е вистинска разгледница од Македонија. Сниман е на неколку автентични локации, најмногу во Охрид и на Галичник. Спотот го потпишува продукциската куќа „Мелем“, со Огнен Шапковски. Главната женска улога ја има македонската манекенка Ангелина Китановска, која Рајовиќ лично ја одбрал бидејќи според неговите критериуми, ја има онаа македонска природна убавина.
– Новата песна која е обоена во боите на Македонија и нејзиното знаме навистина ми легна, се вклопи со мојот начин на интерпретации. „Ружа са југа“ ќе биде песна која ќе се пее насекаде, не само во убавата Македонија. Низ секој стих се чувствува Македонија, која поодамна ја носам во срцето, вели Бобан Рајовиќ.
„Ружа са југа“ ќе биде промовирана до крај на месецот мај и е дел од неговиот истоимен музички проект. Првиот дел од тој проект содржи четири песни. Сите се автобиографски, длабоко интимни.
– Имам многу македонски пријатели и долго размислував за песна за Македонија или за песна во која ќе се споменува името Македонија. Се надевам дека луѓето низ „Ружа са југа“ ќе ја почувствуваат душата на оваа питома земја, на драгите луѓе. Низ спотот ќе ги видат и преубавите македонски предели и градови, особено Охрид. Додека ја пеам песната, чувствувам една душа, една емоција, едно гостопримство кое го наоѓам само во Македонија. Едноставно, морав да го направам сето ова, затоа што долго ми лежеше на срцето, радосно раскажа Рајовиќ.
(Д. М.) фото:архива – ФБ
