Руските власти во петокот признаа дека дел од регионите во земјата повторно се соочуваат со недостиг на бензин, во услови на засилени украински напади врз руските нафтени рафинерии.
Украина со месеци изведува напади со дронови и ракети врз руски енергетски објекти, со цел да го погоди еден од клучните извори на приходи за руската армија.
Русија оваа недела ја затвори големата рафинерија во Орск, која се наоѓа на околу 1.300 километри од линијата на фронтот. Според локалните власти, рафинеријата ќе биде надвор од функција околу шест месеци по нападот.
„Ситуацијата останува напната во неколку региони во земјата во однос на снабдувањето со гориво на бензинските станици“, соопшти руската влада на социјалните мрежи.
Нафтените компании, според владата, преземаат мерки за да ги зголемат испораките во најпогодените региони. Одржан е и владин состанок посветен на недостигот, а вицепремиерот задолжен за енергетиката, Александар Новак, наредил следење на цените на горивото.
Компаниите и возачите во Русија веќе неколку месеци се соочуваат со повторливи проблеми во снабдувањето. Речиси секој руски регион во одреден момент морал да воведе ограничувања во продажбата на гориво или други форми на рационализација, вклучително и забрана за полнење гориво во канистри.
Еден од најтешко погодените региони е Краснодар, на Црното Море, познат по своите туристички летувалишта.
„Ситуацијата со снабдувањето со бензин на бензинските станици стана комплицирана“, изјави гувернерот Венијамин Кондратјев.
Тој рече дека нафтените компании повторно почнале да ги ограничуваат количините гориво што ги испорачуваат, а дел од бензинските станици го намалиле и работното време.
„Ова предизвикува загриженост кај жителите и посетителите на регионот“, додаде Кондратјев, кој побара од властите да обезбедат дополнителни количини гориво.
Гувернерот на регионот Оренбург, каде што се наоѓа рафинеријата во Орск, во четвртокот потврди дека објектот е затворен и дека поправките ќе траат со месеци.
Рускиот претседател Владимир Путин уште во јуни за првпат призна дека земјата се соочува со „одреден недостиг“ на гориво.
На состанок со претставници на властите, посветен на состојбата со снабдувањето, Путин призна дека Русија минува низ „тежок период“, но истакна дека Москва ќе ги исполни сите свои социјални обврски.
Набргу потоа, во изјава за руската државна телевизија, Путин рече дека руската воена индустрија брзо ќе го зголеми производството на системи за противвоздушна одбрана, со цел да се спротивстави на украинските напади.
