Хрватска оцени дека решавањето на отворените билатерални прашања со Црна Гора е неопходен предуслов за успешно завршување на пристапните преговори на Подгорица со Европската Унија.
Според хрватските власти, принципот на добрососедски односи е еден од клучните политички критериуми во процесот на проширување на ЕУ и е јасно вграден во Преговарачката рамка за Црна Гора, како и за останатите земји кандидати.
Хрватска истакнува дека Европската Унија јасно порачува оти не може и не сака да увезува билатерални спорови, поради што сите отворени прашања треба што поскоро да бидат решени за да не го оптоваруваат ниту пристапниот процес, ниту меѓусебните односи.
Кон крајот на 2024 година, Загреб повторно ја повика Црна Гора на дијалог за решавање на преостанатите отворени прашања. Хрватска наведува дека во текот на целиот процес покажала стратешко трпение и разбирање, но дека сега е време црногорската Влада да преземе конкретни чекори.
Меѓу клучните очекувања на Хрватска се: обештетување на поранешните логораши, продолжување на потрагата по 14 исчезнати лица од Татковинската војна, процесуирање на воените злосторства, решавање на имотно-правните спорови на хрватските семејства во Црна Гора, зачувување на спомен-плочата на поранешниот логор Морин, промена на името на базенот во Котор, продолжување на разговорите за поморската граница, како и враќање на школскиот брод „Јадран“.
Хрватска потсетува дека до крајот на 2026 година остануваат само неколку месеци и повторно ја повикува црногорската страна на конструктивен дијалог и забрзано решавање на сите отворени прашања.
