Спортски менаџмент добива нова развојна шанса преку Олимписката обука за напреден спортски менаџмент за 2026 година, која Македонскиот олимписки комитет, во соработка со Меѓународниот олимписки комитет, ја започна во просториите на Олимпискиот дом со цел да се зајакнат знаењата и капацитетите на спортските федерации, клубови и стручни кадри.
Обуката официјално ја отвори претседателот на МОК, Даниел Димевски, кој ги поздрави присутните учесници, а свое обраќање имаше и генералниот секретар Ѓорги Тасев, кој им посака успешна работа во претстојниот период.
Првиот ден од програмата беше посветен на воведниот модул „Вовед во Олимписката обука за напреден спортски менаџмент“, под водство на д-р Сашо Поповски. Со тоа започна шестмесечен процес на обука што треба да им помогне на учесниците подобро да ги разберат современите начини на водење, планирање и развој на спортските организации.
Во новиот циклус е формирана група составена од претставници на спортските федерации од индивидуалните и колективните спортови, како и од стручни лица кои се дел од структурите на олимписките клубови и федерации. Таквиот состав ѝ дава на програмата практична вредност, бидејќи знаењето треба директно да се пренесе во спортските системи.
Програмата опфаќа седум клучни модули, меѓу кои стратешко управување, финансии, човечки ресурси и спортски маркетинг. По завршувањето на модулите и одбраната на седум практични трудови, кандидатите ќе се стекнат со Меѓународна диплома за напреден спортски менаџмент, официјално признаена од ИОК.
