Турската уметничка сцена загуби големо име – почина актерот Ариф Еркин Ѓузелбејоглу, познат и сакан и кај македонската публика по улогите во повеќе популарни серии, меѓу кои и мегахитот „Сулејман Величествениот“. Веста за неговата смрт ја објави реномираниот турски канал Хабертурк, наведувајќи дека актерот починал на 91-годишна возраст.
Актерот го прослави својот 90-ти роденден во септември, но само еден месец подоцна, јавноста беше потресена од информацијата за неговото заминување.
Ариф Еркин Ѓузелбејоглу беше вистинска легенда во Турција – со актерска кариера што започнала уште на 15-годишна возраст, тој настапувал во бројни театарски претстави, филмови и серии, оставајќи неизбришлив траг во турската култура.
Покрај уметноста, Ѓузелбејоглу имал и кариера како архитект, работејќи повеќе од 30 години во градската администрација на Истанбул – подеднакво посветен на јавниот и културниот живот на земјата.
На македонската публика ѝ е најпознат по улогата во серијата „Сулејман Величествениот“, каде што го толкуваше ликот на државниот службеник Пири Мехмет Паша, верен и мудар соработник на султанот.
Погребот на актерот ќе се одржи во сабота во Истанбул, а турските медиуми јавуваат дека на церемонијата ќе присуствуваат бројни личности од уметничкиот и јавниот живот. Со заминувањето на Ѓузелбејоглу, Турција – а со неа и многубројната публика на Балканот – останува без уште еден симбол на златната ера на телевизиските драми.
