Во текот на изминатото деноноќие Министерството за внатрешни работи регистрирало 10 пријави за семејно насилство на повеќе локации низ државата, при што пет лица се лишени од слобода, а со едно лице е извршен службен разговор.
Во Скопје биле пријавени повеќе случаи на физичко насилство, закани и психичко вознемирување. Еден 46-годишен скопјанец бил приведен поради физички напад врз сопругата, додека други жени пријавиле насилство од поранешни или вонбрачни партнери, како и закани од членови на семејството.
Приведувања имало и во Кочани, Штип, Делчево, Велес и Крива Паланка. Во дел од случаите жртвите навеле дека подолг временски период биле изложени на физичко и психичко малтретирање. Во Делчево, кај осомничениот сопруг биле измерени 1,79 промили алкохол во крвта.
Во Велес еден случај добил дополнителна димензија откако биле вклучени јавен обвинител и Центарот за социјални работи поради меѓусебни обвинувања за насилство во семејството.
Од МВР информираат дека се преземаат мерки за расчистување на сите случаи и по нивното целосно документирање ќе бидат поднесени соодветни пријави против сторителите.
