Севернокорејска ракетна единица почнала да се распоредува во западниот дел на Русија и би можела да биде опремена со 120 балистички ракети и шест лансери за напади врз Украина, тврди украинската воена разузнавачка служба.
Андриј Черњак од Главната разузнавачка управа на Украина изјави дека околу 90 припадници на севернокорејската армија треба да бидат распоредени во рускиот регион Воронеж, во рамките на 112. ракетна бригада на руските сили.
Според украинското разузнавање, Северна Кореја веќе испратила нова пратка од 40 балистички ракети од типовите KN-23 и KN-24, заедно со воен персонал. Конечниот број ракети и начинот на распоредување треба да бидат утврдени на разговори на високо ниво следниот месец.
Засега не е познато каква точно улога ќе има севернокорејскиот персонал во ракетните операции на руската армија.
Русија минатата недела повторно употребила две севернокорејски ракети во нападите врз Украина, првпат по август 2025 година, според податоците на украинската страна. Една од ракетите погодила куќа во селото Радушне, при што загинале пет членови на едно семејство.
Ракетите KN-23 и KN-24 имаат поголем дострел и носат поголема боева глава од рускиот систем „Искандер“, но се помалку прецизни. Нивното пресретнување е особено тешко за украинската противвоздушна одбрана, која располага со ограничен број системи способни да соборуваат балистички ракети.
Според Черњак, Северна Кореја од крајот на 2023 до август 2025 година ѝ испорачала на Русија околу 150 балистички ракети. Пјонгјанг испратил и милиони артилериски гранати, повеќецевни ракетни системи и друга воена опрема.
Украинското разузнавање проценува дека во руската област Курск и натаму има околу 9.500 севернокорејски војници, иако тие во моментот не учествуваат директно во борбените операции против Украина. Севернокорејски сили првпат беа распоредени во регионот во 2024 година.
Украинскиот претседател Володимир Зеленски претходно изјави дека Русија се подготвува да прими уште 30.000 севернокорејски војници и дека дел од подготовките се спроведуваат во регионот Воронеж. Москва и Пјонгјанг во изминатите години значително ја проширија воената соработка.
