Иран предложил договор до американскиот претседател Доналд Трамп со кој би се отворил Ормутскиот Теснец за пловидба и би завршила американската блокада врз Иран, додека преговорите за иранската нуклеарна програма би биле одложени за подоцнежна фаза, изјавил висок ирански функционер.
Според предлогот, војната би завршила со гаранции дека Израел и САД нема повторно да го нападнат Иран. За возврат, Техеран би го отворил теснецот, а Вашингтон би ја укинал блокадата.
Потоа би следеле преговори за ограничувањата на иранската нуклеарна програма во замена за укинување на санкциите, при што Иран бара САД да го признаат неговото право на збогатување ураниум за мирнодопски цели.
Трамп изјави дека „не е задоволен“ од најновиот ирански предлог, без да прецизира кои делови ги отфрла.
Иран тврди дека неговата нуклеарна програма е мирнодопска, додека Вашингтон инсистира дека нема да стави крај на конфликтот без договор што ќе спречи Техеран некогаш да дојде до нуклеарно оружје.
