Вицепремиерот и министер за транспорт Александар Николоски изјави дека директната авионска линија Женева – Скопје е воспоставена по иницијатива на македонската дијаспора, со цел да се олесни поврзувањето на иселениците со татковината.
Николоски ова го соопшти по партиски настан на ВМРО-ДПМНЕ во Ново Село, каде што се сретнал со претставници на дијаспората, како и со членови и симпатизери на партијата.
„Токму на барање на дијаспората отворивме директна линија Женева – Скопје. Лет кој многу го користи дијаспората и со кој почесто и полесно се враќаат во Македонија“, напиша Николоски на својот профил на Фејсбук.
Тој оцени дека средбата во Ново Село поминала во позитивна атмосфера и нагласи дека партијата останува посветена на проектите што, според него, го подобруваат животот на граѓаните.
Во својата објава Николоски најави и продолжување на инфраструктурните инвестиции во југоисточниот регион, посочувајќи дека се работи на проектот за изградба на експресниот пат Радовиш – Струмица – Ново Село.
„Уште еден значаен инфраструктурен проект кој ќе го подобри животот на жителите од овој регион“, истакна Николоски.
