НАТО денеска соопшти дека почнал мисија за зајакнување на своето присуство на Арктикот како дел од договорот за ублажување на сериозните тензии во Алијансата, предизвикани од желбата на американскиот претседател Доналд Трамп, САД да го добијат Гренланд.
Новата мисија, наречена „Арктички стражар“, ќе го координира се поголемото воено присуство на сојузниците на НАТО во регионот, вклучително и вежби, како што е данската вежба „Арктичка издржливост на Гренланд“, се наведува во соопштение воениот штаб на Алијансата.
Врховниот командант на сојузничките сили на НАТО во Европа, генералот на американското воздухопловство, Алексус Грегори Гринкевич изјави дека мисијата ја нагласува посветеноста на Алијансата да ги заштити своите членки и да ја одржи стабилноста во едно од стратешки најважните подрачја во светот.
