Светските пазари на нафта ја завршуваат годината со значителни загуби, при што цените на „црното злато“ паднаа за околу 20 проценти од почетокот на јануари. Минатата недела, во услови на намалена празнична ликвидност, цената на барелот на лондонскиот пазар се задржа на 60,64 долари, додека на американскиот пазар изнесуваше 56,74 долари.
Аналитичарите посочуваат дека главниот притисок доаѓа од стравот за прекумерна понуда во 2026 година, кога Меѓународната агенција за енергија (ИЕА) предвидува вишок од речиси четири милиони барели дневно. Иако геополитичките тензии, како блокадите на венецуелската нафта, повремено ги поддржуваат цените, сепак доминира негативниот тренд.
Дополнителен фактор за падот е и оптимизмот за можен мировен договор меѓу Русија и Украина, што би овозможило враќање на руските енергенси на глобалниот пазар. Доколку овој тренд продолжи до крајот на декември, ова ќе биде најголемиот годишен пад на цената на нафтата во последните пет години.
