Полицијата во Тузланскиот кантон утрово добила електронска порака во која се тврди дека во повеќе училишта се поставени експлозивни направи. Истата или слична порака, според медиумските извештаи, била испратена и директно на адресите на неколку училишта, по што веднаш биле активирани безбедносните протоколи.
Од кантоналната полиција соопштиле дека полициски службеници од надлежните управи и станици, како и припадници на секторот за криминалистичка полиција, преземаат мерки за проверка на наводите и за обезбедување на објектите. Во тек се контрадиверзиски прегледи, а сите училишта во кантонот се евакуираат за да може проверките да се спроведат безбедно.
Паралелно со тоа, полицијата спроведува истрага за да го утврди испраќачот на пораките. Според Н1, во регионот веќе имало слични случаи, а полицијата во претходни истраги идентификувала дел од испраќачите на вакви лажни дојави, меѓу кои имало и малолетници.
Подоцна во текот на денот, дел од медиумите објавија дека дојавите во училиштата во Тузланскиот кантон биле лажни, но институциите и натаму продолжуваат со постапките за целосно расчистување на случајот.
