Младата пејачка од Скопје Марија Јаковлеска ја освои првата награда на стручното жири на вечерта на забавна музика на меѓународниот музички фестивал Студентско лето во Маглај, Босна и Херцеговина. 26-годишната Марија до овој голем успех дојде со триумфално исполнение на безвременскиот хит на Селин Дион „The Power of Love“. Понатаму, стручното жири третото место му го додели на уште еден претставник од Македонија – младиот прилепчанец Сергеј Попоски кој ја испеа „Unchained Melody“ на бендот Righteous Brothers.
Студентско Лето е реномиран меѓународен фестивал на млади изведувачи кои се натпреваруваат во категориите на народна и забавна музика, а оваа година го доживува своето 53-то издание. На претходната вечер на Фестивалот во категоријата на народната музика запазен настап имаше и пејачката Божица Китановска која се претстави „Со маки сум се родила“ додека првата награда на стручното жири ѝ припадна на Србинката Марта Станковиќ која ја отпеа популарната „Врањанка“.
Марија Јаковлеска е прв претставник од Македонија кој успеал да ја освои прва награда на овој угледен фестивал уште од 1974 година, кога првата награда ѝ припадна на прославената Верица Ристевска.
