Брисел/Скопје, 24 март, Zhurnal.mk – Европската комесарка задолжена за проширување на Европската Унија, Марта Кос, вчера ги повтори повиците на ЕУ до Владата и Собранието на Северна Македонија да ја вклучат бугарската заедница во Уставот, што е предуслов од 2022 година за земјата да може да ги отвори преговорите за членство со европскиот блок.
Апелот беше упатен за време на нејзината средба со министерот за надворешни работи, Тимчо Муцунски, во Брисел, според функционер на Европската комисија, пишува Zhurnal.mk.
„За време на средбата, комесарката Кос ја охрабри Северна Македонија да усвои уставни измени како предуслов за какви било понатамошни чекори во процесот на пристапување и да ги интензивира напорите за клучните реформи на ЕУ, особено во делот на владеењето на правото“, изјави функционер на Европската комисија за dtt-net.com.
Премиерот Христијан Мицкоски одбива да го промени Уставот и бара Бугарија и ЕУ прво да ги исполнат неговите два услови, кои се однесуваат на прифаќање на правата на македонската заедница во Бугарија од страна на Софија и добивање формални гаранции од Бугарија и ЕУ за македонскиот идентитет и јазик, кои Бугарија одбива да ги признае.
Мицкоски и ВМРО-ДПМНЕ стравуваат дека Бугарија повторно би можела да го искористи своето право на вето во ЕУ за време на преговорите за пристапување и да наметне дополнителни услови, кои би можеле да бидат поврзани со македонскиот јазик и историја, бидејќи Бугарија не го признава македонскиот јазик и го третира како дериват на бугарскиот јазик.
Според претставникот на Европската комисија, Кос и Муцунски разговарале и за „континуиран напредок во акцискиот план за малцинствата и други стандарди за отворање на Поглавје 1 од процесот на пристапување, како и за добрососедските односи“.
Поглавје 1 од преговорите за пристапување се однесува на слободното движење на стоки.
Претставникот додаде дека Кос, исто така, ја повикала Владата во Скопје да се фокусира на усвојување на ревидиран закон за Судскиот совет, Изборниот законик, Кривичниот законик и Законот за кривичната постапка.
