Несекојдневна и невообичаена глетка рано утрово ги изненади жителите на скопската населба Карпош, каде што кобила донела на свет младо жребе директно на една од локалните градски површини.
Сцената, објавена на социјалната мрежа Фејсбук од страна на граѓанинот Игор Паневски, е забележана непосредно по породувањето, а од фотографијата се гледа новороденото жребе кое според својата состојба било старо само неколку минути.
Утринската градска рутина во еден од најурбаните и најгусто населените делови на Скопје започнала со глетка што многу почесто се очекува во рурални средини отколку на скопскиот асфалт. Сцената за кратко време предизвика голем интерес и бран реакции кај граѓаните на социјалните мрежи, кои истовремено изразија симпатии кон животното, но и загриженост за условите во кои тоа се наоѓа.
Засега нема официјални информации кој е сопственикот на животните, ниту под кои точно околности кобилата се нашла препуштена сама на себе на оваа градска локација во моментот на породувањето.
Граѓаните очекуваат надлежните општински и ветеринарни служби соодветно да реагираат за да им обезбедат соодветна нега и безбедно засолниште на мајката и нејзиното новородено жребе.
