Министерството за трговија и Фондот за пензиско и инвалидско осигурување (ПИО) во Србија упатија апел до пензионерите да бидат особено внимателни при прифаќање понуди за купување производи и услуги, поради зголемен број пријави за измами.
Според надлежните, одредени компании ги доведувале во заблуда постарите граѓани, продавајќи им производи по многу високи цени, а во поединечни случаи биле откриени и фалсификувани административни забрани и потписи, со кои од пензиите им се одбивале средства без нивна согласност.
Министерката за внатрешна и надворешна трговија, Јагода Лазаревиќ, изјави дека најчести жртви на ваквите измами се токму пензионерите и најави засилена соработка меѓу институциите за спречување на злоупотребите.
Директорот на Фондот ПИО, Реља Огњеновиќ, потврди дека Фондот примил голем број поплаки од пензионери кои тврделе дека биле измамени од поединечни фирми.
Како мерка за заштита, Фондот раскинал договори за деловна соработка со одредени компании и поднел кривични пријави во случаите каде што биле откриени фалсификувани документи. Истовремено, јавноста постојано се предупредува внимателно да ги чита сите договори и документи пред потпишување.
Од Фондот потсетуваат дека, според законот, се должни да постапат по секоја уредно пополнета и потпишана изјава со која пензионерот дозволува од неговата пензија да се вршат административни одбитоци во корист на одредена компанија. Затоа, институциите апелираат граѓаните да не потпишуваат документи доколку не се целосно сигурни во нивната содржина.
