52-годишниот Илија Танчев од Пловдив е лицето што исчезна при нуркање во водите на Охридското Езеро. Во петокот тргнал кон Охрид, а на својот профил на Facebook претходно објавил фотографија на која се гледа дел од неговата опрема.
Во саботата нуркал во Охрид со пријател, кој бил локален жител. Кога Танчев не излегол на површина, пријателот го пријавил случајот кај надлежните служби, јави порталот Скопје 1.
Според првичната информација од СВР Охрид, на 9-ти август 2025 година, во 13:15 часот, во СВР Охрид и езерската полиција е пријавено дека 52-годишниот И.Т. од Република Бугарија, исчезнал при нуркање на длабочина од 89 метри во водите на Охридското Езеро, над селото Трпејца.
– Мерките за негово пронаоѓање ги спроведуваа тимови од Езерската полиција, Црвен крст со нуркачи од нуркачкиот клуб „Амфора“, информираат од СВР Охрид.
