Грчкиот парламент им го одзеде имунитетот на 13 пратеници од владејачката партија Нова демократија, поради сомнежи за вмешаност во скандал со злоупотреба на европски земјоделски субвенции.
Во центарот на случајот е државната агенција ОПЕКЕПЕ, задолжена за распределба на средствата од Европската Унија. Според истрагата на Европското јавно обвинителство, во периодот од 2019 до 2024 година бил воспоставен систем на измама преку фалсификување документи за сопственост на пасишта, со што биле проневерени повеќе од 22 милиони евра.
Поради пропустите во управувањето со овие средства, Брисел веќе ја казни Грција со 390 милиони евра, што дополнително го засили притисокот врз властите во Атина.
Скандалот сериозно ја нарушува довербата во Владата на премиерот Киријакос Мицотакис и отвора прашања за контролата врз европските фондови.
