Две експлозии одекнале рано утринава во централното подрачје на Атина, откако непознати лица фрлиле експлозивни направи врз два различни деловни објекти. Според првичните информации од грчката полиција, во нападите нема повредени лица.
Првиот инцидент бил регистриран околу 4:25 часот по локално време на улицата Ахарнон. Рачна граната била фрлена кон продавница за здрава храна, во која во моментот на нападот се наоѓал припадник на обезбедувањето од сириско потекло.
Само половина час подоцна, околу 4:55 часот, следувал уште еден напад во атинската населба Агиос Пантелеимонас. Според информациите, непознат сторител фрлил експлозивна направа кон бар во сопственост на сириски државјанин.
И покрај експлозиите, нема информации за повредени лица. Грчката полиција ги истражува двата случаи, како и евентуалната поврзаност меѓу нападите.
